Familjarët e 31-vjeçares që humbi jetën muajin e kaluar pas lindjes së fëmijës protestuan sot para Prokurorisë në Fier.
Bashkëshorti dhe familjarët e Elisabeta Lamaj akuzojnë mjekët për ndarjen nga jeta të nënës së re dhe kërkojnë të zbardhet ngjarja tragjike që ndodhi më 2 prill.
“Të gjithë pjesët që ka shqyrtuar prokuroria, duke marrë nga materialet nga kamerat, nga mospyetja e një familjari tonë, të gjitha këto mua më çojnë në neglizhim.
Mosdalja e ekspertizës mjeko-ligjore, e cila ka afate ligjore deri në 2 javë sot ne kemi 4 javë e dy ditë gjë që do të thotë askush nuk na ka dhënë një përgjigje dhe as nuk duan të na japin një përgjigje.
Ai mjek plehra me gjithë të shoqen kanë fshirë çdo gjë dhe mendojnë se do të mbetet në heshtje, por kjo gjë nuk do të mbetet në heshtje do të vazhdojmë deri në fund deri sa fajtori të dalë.
Realisht aty ka shumë fajtorë, salla nuk ka qenë gati. Të më japin një shpjegim unë kërkoj një të drejtë. Prokuroria është ajo që nxjerr dhe i kërkoj të nxjerrë sa më shpejt ekspertizën mjeko-ligjore”, tha bashkëshorti i së ndjerës.
Ata thonë se askush nuk ua ka marrë dëshmitë. Familjarët qëndruan për pak orë para dyerve të Prokurorisë, duke kërkuar përgjigje për hetimin e vdekjes së nënës së re në sallën e lindjes.
