Pika kufitare e Kakavijës ka qëndruar e mbyllur e mbyllur pas hyrjes në grevë nga pala greke. Sipas të dhënave, 750 shtetas kanë kaluar kufirin nga Shqipëria drejt Greqisë që prej orës 6 të mëngjesit.
Ata që po kalojnë kufirin janë kryesisht punëtorë sezonalë që i pret një kontratë në anën greke të kufirit. Edhe për ta nuk ka qenë shumë e lehtë. Disa tregojnë se kanë rikthyer sërish tek kjo radhë pasi janë kthyer pas nga autoritetet greke ditë më parë për parregullsi të ndryshme. Ajo që vlen të theksohet është se në këtë radhë nuk është duke u respektuar distancimi social.
Disa shtetas nuk kanë nguruar të flasin për kamerat e televizioneve kombëtare, ku ndër të tjerat kanë thënë:
“Unë po shkoj në Lamia të Greqisë. Para tre ditësh më kthyen, nuk e di se çfarë më nxorën. Mua m’i ka dërguar të gjitha letrat pronarja të shohim sot. Tani u ktheva dhe bëra test tjetër sepse kishin kaluar 72 orë”
“Bashkë jemi të tre. Na kthyen ca ditë më parë. Vetëm na thanë ikni pas. Nuk e morëm vesh. Bëmë teste përsëri dhe do ta provojmë edhe sot.”
“Po shkoj në Greqi për të punuar. Të paktën të punoj dy muaj e pastaj do kthehem prapë. E di që bëjnë teste të tjera në anën tjetër, nuk e di kur të kalojmë do shohim.”
Nga ana tjetër edhe për transportin e mallrave qarkullimi ka qenë i ndërprerë gjatë 24 orëve të kaluara ndërsa radha e mjeteve të transportit shkonte sot në mëngjes në gati 1 km.
