Sipas burimeve të policisë së Elbasanit, 2 kg e 400 gr eksploziv janë vendosur në njërën prej kollonave të vilës së braktisur të Talo Çelos, i cili është shpallur në kërkim.
Sasia e eksplozivit ishte lidhur me një fitil zjarrpërcjellës me gjatësi 204 cm.
Fatmirësisht fitili nuk është djegur plotësisht, pasi nëse do kishte shpërthyer sasia prej 2 kg e 400 gramë tritol, pasojat dhe dëmet materiale në vilën e braktisur të Talo Çelës, do ishin më të mëdha.
Tritoli ishte vendosur në dy kollona, por vetëm një sasie e vogël ka shpërthyer, duke shkaktuar dëmtimin e xhamave dhe fasadës së dritareve që ndodhen në pjesën ballore të shtëpisë.
Ndërkohë, për sa i përket kamerave filmike që ndodhen të instaluara në muret e vilës së Talo Çelës, policia thotë se nuk kanë regjistruar asnjë nga autorët, pasi në banesë nuk ka pasur paisjen e DVR-së, që shërben për ruajtjen e pamjeve filmike.
Ngjarja e ndodhur në 5 nëntor, sipas policisë së Elbasanit, ka lidhje me ngjarjen e datës 3 nëntor 2020 të ndodhur në Durrës, ku në banesën e Skënder Hoxhës, kushëririt të Nuredin Dumanit, u vendos një sasi e konsiderueshme tritoli, duke shkaktuar dëmtime të shumta.
Kjo përplasje vjen si pasojë e prishjes së miqësisë mes Nuredin Dumanit dhe Talo Çelës, të dy persona të shpallur në kërkim.
