Vazhdon vaksinimi i personelit shëndetësor në Qendrën Spitalore “Xhaferr Kongoli” në Elbasan. Prej të shtunës në këtë spital ka nisur vaksinimi i mjekëve dhe infermierëve. Deri mesditën e sotme ishin vaksinuar 178 bluza të bardha dhe procesi vazhdon.
Në ditët e para janë duke u vaksinuar personeli shëndetësor i Qendrës Spitalore dhe Njësisë Vendore të Kujdesit Shëndetësor. Më pas do të vaksinohen stafi mjekësor i spitaleve Peqin, Belsh, Gramsh, Cërrik, Librazhd dhe Prrenjas e më tej personeli i qendrave shëndetësore në fshatra.
Sipas Flutura Sinanit, koordinatore e procesit të vaksinimit në Qendrën Spitalore të Elbasanit, procesi po vijon normalisht. Sipas saj, janë marrë të gjitha masat që vaksinimi të kryhet brenda parametrave të kërkuar. Vaksina merret në -70 gradë në Institut shoqërohet me polici dhe pastaj ruhet në temperaturën 2 gradë dhe duhet që të përdoret brenda 5 ditëve.
Pas përfundimit të fazës së parë do merret doza e dytë e vaksinës. Gjatë një viti pandemi, Elbasani ka pasur shumë humbje jete edhe nga personali shëndetësor, mjekë, infermierë dhe punonjës të prapavijës.