Vaksinat e reja të Covid-19 duhet të jenë gati për një vit ose më pak para se vaksinat e para të jenë të paefektshme dhe të duhen formulime të modifikuara, sipas një studimi të epidemiologëve, virologëve dhe specialistëve të sëmundjeve infektive.
Shkencëtarët kanë theksuar prej kohësh se një përpjekje globale e vaksinimit është e nevojshme për të neutralizuar në mënyrë të kënaqshme kërcënimin e Covid-19. Kjo është për shkak të kërcënimit të varianteve të virusit – disa më të transmetueshëm, vdekjeprurës dhe më pak të ndjeshëm ndaj vaksinave – që po shfaqen.
Parashikimi se vaksinat e reja duhen për një vit ose më pak vjen nga dy të tretat e të anketuarve, sipas Aleancës së Vaksinave të Popullit, një koalicion i organizatave duke përfshirë Amnesty International, Oxfam dhe UNAIDS, të cilët kryen sondazhin me 77 shkencëtarë nga 28 vende. Gati një e treta e të anketuarve treguan se afati kohor ka gjasa të jetë nëntë muaj ose më pak.
Vaksinat e pakta në shumë vende do ta bënte më të mundshme shfaqjen e mutacioneve rezistente ndaj vaksinave, thanë 88% e të anketuarve, të cilët punojnë nëpër institucione të shquara të tilla si Johns Hopkins, Yale, Imperial College, London School of Hygiene & Tropical Medicine dhe Universitetin e Edinburgut.
“Mutacione të reja lindin çdo ditë. Ndonjëherë gjejnë një vend që i bën më të aftë se paraardhësit e tyre. Këto variante mund të transmetojnë sëmundjen në mënyrë më efikase dhe potencialisht të shmangin përgjigjet imune ndaj llojeve të mëparshme. Në qoftë se nuk vaksinojmë botën, ne e lëmë fushën e lojës të hapur për gjithnjë e më shumë mutacione, të cilat mund të shmangin vaksinat tona aktuale dhe të kërkojnë doza të tjera përforcuese për t’i luftuar,” tha në një deklaratë Gregg Gonsalves, profesor i asociuar i epidemiologjisë në Universitetin e Yale.
Covax – koalicioni global i vaksinave që synon t’i kundërvihet të ashtuquajturit nacionalizëm vaksinash – shpreson të jetë në gjendje të furnizojë të paktën 27% të popullsisë së vendeve me të ardhura më të ulëta me vaksina në vitin 2021.
