Valon Syla, gazetari nga Kosova i cili është drejtor i portalit “Metro”, është sulmuar fizikisht, çka është publikuar edhe në një vidio të Indeksonline.
Zëdhënësja e policisë për rajonin e Prishtinës, Flora Ahmeti, tha se rasti është vënë nën hetim.
“Morëm njoftime se një person është sulmuar fizikisht në lagjen “Pejton” në Prishtinë. Menjëherë në vendngjarje kanë dalë njësitë e nevojshme policore dhe po merren me çështjen”, tha Ahmeti.
Arsyet e sulmit janë ende të paqarta. Asociacioni i Gazetarëve të Kosovës e dënoi ashpër agresionin ndaj Sylës.
“Në videon e cila po qarkullon në rrjetet sociale, Syla shihet duke u grushtuar nga një person i panjohur. Në lidhje me këtë çështje, AGK-ja ka kontaktuar Policinë e Kosovës, e cila konfirmoi episodin”, thuhej në reagimin e Asociacionit.
Valon Syla ka qenë gazetar i Radio Televizionit të Kosovës dhe për disa vite korrespondent nga Beogradi.
