Godoleshi është fshati në Shqipëri ku prodhohen mijëra ton qershi.
Sivjet prodhimi është mjaft i mbarë. Pemët janë të mbushura plot me qershi të shëndetshme bio që kuqëlojnë nëpër degë.
I gjithë fshati është i punësuar këto ditë me vjeljen e qershive. Kjo pemë është e vetmja që u siguron atyre të ardhura.
Por banorët e Godoleshit janë duke sakrifikuar shumë. Atje transporti i frutit delikat dhe aq të dëshiruar të pranverës, kryhet me kafshë.
Tregu i Elbasanit është thuajse i ngopur me qershi, pasi prodhojnë edhe fshatrat përreth. E vetmja shpresë janë tregtarët që vijnë nga Tirana dhe Durrësi. Por ata e kërkojnë mallin lirë dhe kështu i gjithë mundi shkon dëm për këta fermerë.
Vetë fermerët ankohen se ndodhen në mëshirë të fatit, si nga natyra, ashtu edhe nga qeveria. Vjet breshëri ia lëshoi në tokë të gjithë prodhimin, ndërsa sivjet prodhimi është i bollshëm dhe i mbarë, por mungon… qeveria.
Asgjë nuk është negociuar që ata ta kenë tregun e garantuar. Por mbi të gjitha infrastruktura. Banorët kërkojnë një rrugë që të mund të transportojnë prodhimin.
Shprehen se kanë shumë shpenzime, se është e vetmja e ardhur, se u mungon rruga, se çmimi është i ulët dhe nuk mbulon shpenzimet, se prodhimi po u kalbet dhe po e hedhin në kanal.
Janë të zhgënjyer nga pushtetarë të çdo qeverie pasi të gjithë i kanë gënjyer. Madje para disa kohësh u organizuan vetë me kazma dhe lopata dhe shtruan një copë rrugë. Por e kanë të pamundur që ta ndërtojnë të gjithën.
Aktualisht për çdo ditë në këtë fshat mblidhen mbi 50 ton qershi. Në të gjithë fshatin janë mbjellë mbi 500 hektarë dhe mesatarisht për çdo vit prodhohen 5 mijë ton qershi. Një sasi kolosale që do ta kishte zili çdo fshat në Shqipëri. Por, ashtu si dhe në vende të tjera ku shkojnë dëm, mollët, patatet, qepët, trangujt, domatet etj, në Godolesh kalben qershitë.