Pesë burrat më të pasur të botës nga viti 2020 e kanë dyfishuar pasurinë e tyre. Kjo sipas një studimi të fundit të publikuar nga organizata Oxfam. Në vitin 2020 pesë më të pasurit e botës zotëronin një pasuri prej 450 miliardë dollarësh. Ndërkohë kjo pasuri është rritur tani në 869 miliardë dollarë. Oxfam thekson se të gjithë miliarderet e miliarderët në këtë hapësirë kohore deri në vitin 2023 e kanë rritur pasurinë e tyre në 3,3 bilionë dollarë, cituar nga agjencia e lajmeve, KNA – kjo në një kohë kur gati 5 miliardë njerëzit më të varfër të botës kanë humbur 20 miliardë dollarë pasuri.
Të dhënat bëhen publike teksa ata, njerëzit më të pasur në botë mblidhen nga sot në Davos të Zvicrës, për takimin vjetor të Forumit Ekonomik Botëror të liderëve politikë, drejtuesve të korporatave dhe super të pasurve.
Hendeku midis të pasurve dhe të varfërve ka të ngjarë të rritet, thekson raporti, dhe do të bëjë që bota të kurorëzojë trilionerin e saj të parë brenda një dekade. Në të njëjtën kohë, paralajmërohet se nëse trendet aktuale vazhdojnë, varfëria në botë nuk do të zhduket për 229 vite të tjera.
Duke theksuar një rritje dramatike të pabarazisë që nga pandemia Covid, Oxfam tha se miliarderët në botë ishin 3.3 trilionë dollarë më të pasur se në vitin 2020 dhe pasuria e tyre ishte rritur tre herë më shpejt se norma e inflacionit.
Raporti, “Inequality”, zbulon se shtatë nga 10 korporatat më të mëdha në botë kanë një miliarder si CEO ose aksioner kryesor, pavarësisht stagnimit në standardet e jetesës për miliona punëtorë në mbarë botën.
I përpiluar duke përdorur të dhëna nga kompania kërkimore Ëealth X, raporti thotë se pasuria e kombinuar e pesë njerëzve më të pasur në botë – Elon Musk, Bernard Arnault, Jeff Bezos, Larry Ellison dhe Mark Zuckerberg – është rritur me 464 miliardë dollarë, ose 114%. Gjatë të njëjtës periudhë, pasuria totale e 4.77 miliardë njerëzve më të varfër – që përbën 60% të popullsisë së botës – ka rënë me 0.2% në terma realë.
Njerëzit në mbarë botën po punojnë më shumë dhe orë më të gjata, shpesh për pagat e ulëta, në punë të pasigurta, thotë raporti. Në 52 vende, pagat reale mesatare për afro 800 milionë punëtorësh kanë rënë. Këta punëtorë kanë humbur së bashku 1.5 trilion dollarë gjatë dy viteve të fundit, ekuivalente me 25 ditë paga të humbura për çdo punëtor.
Duke pasqyruar pasurinë e super të pasurve, raporti thotë gjithashtu se fitimet e biznesit janë rritur ndjeshëm pavarësisht presionit mbi familjet në mes të krizës së kostos së jetesës. 148 nga korporatat më të mëdha në botë së bashku kanë grumbulluar 1.8 trilion dollarë në fitime neto totale në vitin deri në qershor 2023, një rritje prej 52% krahasuar me fitimet mesatare neto në 2018 – 2021.
