Një krim pasioni dyshohet të jetë vrasja e 45-vjeçares Fëllënxa Shirja që ka tronditur opinionin publik këtë të shtunë.
Bilbil Shirja 48-vjeç është bashkëshorti i të ndjerës, i cili gjithashtu u gjet i pajetë pak metra larg saj.
Dyshimet e para janë që 48-vjeçari, pas një zënke me bashkëshorten, e ka futur në makinë dhe i ka vënë flakën, duke e djegur të gjallë, e më pas, i ka dhënë fund jetës duke u vetëvarur në një pemë aty pranë.
Çifti ishin në proces divorci dhe herë pas here, ata kishin konflikte mes njëri-tjetrit për motive xhelozie.
Këto kanë bërë që gruaja të ikë nga shtëpia dhe kohët e fundit jetonte me prindërit e saj në Shkallnur të Durrësit.
Viktimat ishin prindër të dy fëmijëve, një vajze e cila ishte e martuar dhe e një djali, adoleshent.
Policia ka nisur hetimet në vendin e ngjarjes dhe ka marrë në pyetje të afërm dhe familjarë të çiftit për të mësuar më tepër rreth shkaqeve të krimit të rëndë.
