Shtimi i rasteve me Covid në qarkun e Elbasanit ka shfaqur një sërë problematika të reja. Skaneri në spitalin e qytetit duhet të përmbush nevojën e mbi 400 mijë banorëve të kësaj zone.
Në këtë spital duhet të trajtohen gjithashtu edhe të sëmurët që vijnë nga Peqini, Librazhdi dhe Gramshi, pasi spitalet e këtyre qyteteve nuk kanë skaner.
Në spitalin e Peqinit, Gramshit dhe Librazhdit mungon paisja me një skaner, i cili do të jetë i nevojshëm për të diagnostifikuar pacientët me Covid-19, nëse nuk kanë kryer ende tamponin.
Erald Gripshi, mjek i urgjencës së spitalit Peqin, ka thënë për mediat kombëtare se të gjithë pacientët me Covid i dërgojnë në Elbasan.
“Rastet që janë të konfirmuara me tampon, ndiqen nga mjeku i familjes në shtëpi, vetëm nëse gjendja rëndohet telefonohet 127. Në urgjencë bëhet triazhimi ku janë infermierët e përcaktuar posaçërisht për tu marrë me këta pacientë. Po të kishim skaner do e lehtësonim punën, shumë pacientë me covid pas disa ditësh paraqesin komplikacione në mushkëri dhe është e nevojshme ekzaminimi me skaner….”, është shprehur mjeku.
Fakti që në zonën e Elbasanit ka vetëm një skaner ka bërë që në spitalin e këtij qyteti të krijohen radhë pritjeje të pacientëve që kanë nevojë për diagnostifikim.
Në konfidencë mjekë e qytetarë kanë konfirmuar se në disa raste ata mund të presin me javë për të kryer diagnostifikimin.
Porse për rastet urgjente me Covid apo edhe sëmundje të tjera, procedurat përshpejtohen.